1447. März 21. Oppeln

Wir Niclas von gotisgnaden herczug inn Slesien vnd herre zu Oppul etc. Thuen kunt mit desim briffe allin die en sehn, horen adir lesin, das vor vns komen sein die vorsichtigen Gindrzich vnd Machna Czepinne seine eliche hawsfraw an eime Vnd Maczke Scholtis von Wowalno am andern teile, Vnd habin sich liplichen vnd gutlichen entscheiden vnd vorricht als von der Scholtissey wegin von des obgnanten dorfis Wowelno in vnserm Oppolischen gebitte gelegin In sulchir weise vnd mosse also das der obgnante Maczke dem obgnanten Gindrzich vnd Machna gegeben hot czwe schok Grosschen, doran em Gindrzich mit seinem weibe gancz vnd gar habin lassin genugen Vnd haben sich vorczegin der obgnanten Scholtissey mit allir irer zugehorunge vnd allir ansproclie mit allin iren Nochkomlingen vnd Nesten, die nicht anczulangen vnd den obgnanten Maczken dobey gerulich vnde gemachsam zu lossin, En, seine geerbin vnd eliche nochkomlinge vnd nesten nymmir anzulangin noch anzusprechin nw vnd czu ewigin czeiten. Czu Orkunde haben wir vnser Ingesigil an desin briff lossin hangin Der gegaben ist zu Oppul am Dinstage vor vnser lieben frawen tage Annuncciacionis Noch gotis gebort firczenhundirt ior vnd dornoch in dem sebene vnd virczigsten Jore. Dobei sein gewest die Ersamen vnd Woltuchtigen vnsere lieben getrawen Probist von Tscharnowans, Jan Bies von Katczerdorff, Heinrich Bies von Elgoth, Micolay Kitczka von Chmelowicz, Micoschs Bies von Blazeowicz, Mickno vnser hewptman vnd Heincze foit, dem deser briff zu schreiben wart befolen.

Mit anhangendem undeutlichen Wappensiegel in rothem Wachs.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.